Et war nees e grousse Spektakel an zum Schluss stoung eng Artistin ganz uewen: Mam Lidd “Mother Nature” gewënnt d’Eva Marija, déi jéngste Kandidatin, déi drëtten Editioun vum Luxembourg Song Contest an der Rockhal a wäert domadder de Grand-Duché beim Eurovision Song Contest zu Wien vertrieden.
“Et ass vraiment crazy”, sou déi 20 Joer al Eva Marija direkt nodeems d’Decisioun annoncéiert gouf. Vill méi Wieder krut si fir d’éischt net eraus, mee glécklecherweis ware genuch Leit ronderëm, fir direkt ze gratuléieren – dorënner och d’Laura Thorn, d’Gewënnerin vun zejoert.
“Ech si sou stolz dëst Land däerfen ze vertrieden”, sot d’Eva Marija an hirem éischten Interview no der Show. “All Kéier wéi d’Jury 12 Punkten annoncéiert huet, hunn ech gespuert, wéi meng Hänn nach méi geziddert hunn.”
Aacht komplett ënnerschiddlech Kandidatinnen a Kandidate mat komplett ënnerschiddleche Lidder stoungen um Samschdeg op der Bün an hunn alles ginn. No der éischter Ronn vum Vott hunn d’Jury, d’Leit Doheem an d’Publikum an der Rockhal zwou Sängerinnen an ee Sänger zeréckbehalen.
D’Irem, d’Eva Marija an de Steve Castile haten d’Nues vir a koumen an déi sougenannte “Super Final”. Nodeems d’Leit dunn eng leschte Kéier hir Stëmmen ofginn hunn, stoung d’Gewënnerin vum Owend fest.
Um Enn war et d’Eva Marija, wat de Vott mat 222 Punkte fir sech decidéiere konnt, dat virum Steve Castille mat 136 an dem Irem mat 122 Punkten. Domadder steet net just d’Gewënnerin vun der drëtter Editioun vum Luxembourg Song Contest fest, mee och, wien am Mee fir de Grand-Duché op de Eurovision Song Contest zu Wien fiert.
Fir d’Eva Marija wäert dëst e ganz spezielle Moment ginn: Net nëmmen däerf hat fir Lëtzebuerg optrieden, mee hat wäert och d’Bün deele mat deem Artist, deen hat vu kleng un inspiréiert huet: den Alexander Rybak, deen 2009 den ESC fir Norwege gewonn huet, an dëst Joer nees mat dobäi wäert sinn.
De Chris Meisch war och live dobäi an huet fir de Luxembourg Song Contest fir de Radio hautno materlieft.
No engem Owend voller Spannung an Emotiounen steet fest: d‘Eva Marija ass d‘Gewënnerin vum Luxembourg Song Contest 2026
