Déi national Preselektioun fir d'Sich no engem Lidd an engem Artist, fir Lëtzebuerg d’nächst Joer beim ESC ze vertrieden, leeft op Héichtouren.
Hannert de Kulisse schaffen aktuell vill Museker a Musekerinnen a Produzenten a Produzentinnen um perfekte Eurovision-Song-Contest-Hit. Och zu Lëtzebuerg ass d’Opreegung an der Zeen nawell grouss a vill vun hinnen haten déi lescht Woche richtege Stress.
Ee vun hinnen ass den Tom Gatti. De fréieren Eternal-Tango-Museker huet zanter 2019 mat e puer Kolleege säi Museksstudio zu Déifferdeng an huet déi lescht Zäit vill ESC-Lidder produzéiert an zum Deel och selwer geschriwwen. Wéi virun 3 Méint annoncéiert ginn ass, datt Lëtzebuerg beim ESC dobäi ass, huet den Tom Gatti direkt ugefaangen, um Projet ze schaffen, a war bis den 1. Oktober och all Dag mam Projet beschäftegt.
© RTL
De Produzent huet mat engen 8 Museker a Musekerinne Lidder opgeholl a gesäit de Retour vum ESC zu Lëtzebuerg als eng immens grouss Chance. Et géing d’Musekszeen zu Lëtzebuerg virubréngen a wann een iergendwann emol uewe wëll matspillen, da misst ee Gas ginn, sou den Tom Gatti.
© RTL
Den 18 Joer ale Melvin huet sech den Tom Gatti als Produzent fir säin ESC-Song ausgesicht. Déi zwee hunn aus dem Melvin sengem geschriwwene Lidd e gemeinsame Pop-Song gemaach. De Primaner wollt onbedéngt e Lidd fir den ESC erareechen a war dofir och direkt bei puer Produzenten. Allerdéngs war d’Zesummenaarbecht net iwwerall gutt an dofir huet e sech um Enn fir den Tom Gatti entscheet. De Melvin betount, datt ee mam Tom richteg gutt kann zesummeschaffen an et géing een och richteg begleet ginn.