De Eurovision Song Contest kritt d'nächst Joer mat engem neie Logo och eng nei Identitéit – dat fir de 70. Jubiläum vun der weltwäit gréisster Live-Museksmanifestatioun, déi 2026 an Éisträich ofgehale gëtt.

D'Organisateuren hunn e Méindeg e vereinfachte Logo presentéiert, inklusiv eegener Schrëft a méi engem dynameschen "E". D'Häerz bleift awer weider am Mëttelpunkt, souwuel vum Logo wéi och vun der Competitioun selwer, wéi d'Organisatioun matgedeelt huet.

Besonnesch fir d'Jubiläumseditioun gëtt eng 3D-Versioun vum Häerz gewisen, déi aus 70 Schichten zesummegesat ass a sou soll déi eenzel Editioune representéieren.

"Beim Eurovision Song Contest geet et zanter dem Ufank ëm Evolutioun – dat souwuel an der Musek, Kultur a Kreativitéit. Dës Erneierung éiert 70 fantastesch Joer a bréngt d'Mark an eng spannend Zukunft", sou den ESC-Direkter Martin Green an engem Communiqué.

D'Erneierung gouf vun der European Broadcasting Union (EBU) zesumme mam brittesche Branding-Studio PALS entwéckelt, déi schonn d'Strategie fir den ESC 2023 zu Liverpool matgestalt hunn.

Déi nei Identitéit wäert an de kommende Méint ëmmer méi visibel ginn, begleet vu weideren Aktivitéiten an Iwwerraschungen am Virfeld vum grousse 70. Anniversaire.

Dir dreemt dovun eng Kéier selwer op der grousser ESC Bün ze stoen? Da mellt Iech hei fir de Luxembourg Song Contest 2026 un!