Wien an Innsbruck hate sech uginn, fir den ESC d'nächst Joer z'organiséieren. Elo steet fest, wéi eng Stad an Éisträich et ass.
De Eurovision Song Contest 2026 wäert zu Wien sinn. Dat hunn d'European Broadcasting Union (EBU) an den éisträichesche Sender ORF e Mëttwoch de Moie matgedeelt. Ënner dem Motto "United By Music" wäert de Museksconcours am Mee 2026 dann also an der Wiener Stadthalle organiséiert ginn.
Och d'Datumen, wéini den ESC 2026 ass, goufen annoncéiert. Déi grouss Finall ass fir e Samschdeg de 16. Mee geplangt, wärend déi zwou Halleffinallen e bësse méi fréi an der Woch den 12. a 14. Mee wäerte sinn.
Dës Decisioun ass no intensive Gespréicher tëscht der EBU, dem ORF an den zwou Stied Wien an Innsbruck getraff ginn. Mat der zentraler Lag, der gudder Infrastruktur an der Erfarung aus de Joren 1967 an 2015 konnt Wien um Enn iwwerzeegen. D'Stad wier och wirtschaftlech gesinn, méi attraktiv gewiescht, och wann Innsbruck e "beandrockend Konzept" gehat hätt, sou den ORF-Generaldirekter Roland Weißmann.
Dass Éisträich den ESC 2026 organiséiert, huet d'Victoire vum JJ dëst Joer zu Basel méiglech gemaach. Elo däerf Wien d'nächst Joer déi ganz ESC-Famill wëllkomm heeschen.
Och Lëtzebuerg ass rëm mat dobäi: de 24. Januar 2026 wäert beim Luxembourg Song Contest decidéiert ginn, wien eist Land op der ESC-Bün zu Wien vertriede wäert.
"Mir sichen dech fir den ESC" D'Inscriptioune fir de Luxembourg Song Contest 2026 sinn op